Першая сусветная ў аб'ектыве. Тэматычная фотавыстава адкрываецца ў Мірскім замку

Фотавыстава "Забытыя героі: Першая сусветная вайна на фатаграфіях Паўла Веліканава" адкрываецца 1 жніўня ў замкавым комплексе "Мір". Аб гэтым паведамілі карэспандэнту БЕЛТА ў музеі.

Выстава падрыхтавана на аснове існуючай у фондах Яраслаўскага дзяржаўнага гісторыкаархітэктурнага і мастацкага музея-запаведніка калекцыі фатаграфій ваеннаслужачага 30-га Сібірскага стралковага палка Паўла Мікалаевіча Веліканава.

"Асабістая гісторыя аўтара фотаработ, якая знайшла адлюстраванне на захаваных здымках часоў Першай сусветнай, з'яўляецца адным з лепшых спосабаў зразумець сутнасць і месца падзей у жыцці людзей, якія былі ўцягнуты ў віхор ваеннага ліхалецця, - расказалі ў музеі. - За гады Першай сусветнай вайны ў рускую армію было прызвана больш за 15 млн чалавек. З іх больш за 130 тыс. - з Яраслаўскай губерні. Яраслаўцы самааддана змагаліся з ворагам. Па волі лёсу яны апынуліся ўдалечыні ад сваёй радзімы. Ураджэнец Норскага пасада Яраслаўскага павета Павел Веліканаў быў сярод іх. Зробленыя ім фатаграфіі адлюстравалі жыццё ў час вайны вачамі звычайнага чалавека: не толькі ваенна-вучэбныя і бытавыя заняткі, ад прыёму ежы да чысткі абмундзіравання, але і наступствы нямецкіх абстрэлаў, акопы і шмат іншага".

На прадстаўленых на выставе фотаздымках адлюстраваны і Мірскі замак пасля артылерыйскіх абстрэлаў. Частка здымкаў зроблена ў бліжэйшых да Міра вёсках.

Выстава будзе працаваць да 29 жніўня. Уваход на яе бясплатны. -0-

БЕЛТА - Навiны Беларусi