Сітуацыя ў рэгіёне, дзе праходзіць "лінія мірнага фронту". Лукашэнка прыняў з дакладам Рагожніка

Прэзідэнт Беларусі Аляксандр Лукашэнка 28 ліпеня прыняў з дакладам старшыню Віцебскага аблвыканкама Аляксандра Рагожніка, перадае карэспандэнт БЕЛТА.

Размова ішла аб сітуацыі ў Віцебскай вобласці, у тым ліку ў сельскай гаспадарцы. Кіраўнік дзяржавы спытаў, як разгортваюцца падзеі, цікавіўся наяўнасцю праблемных момантаў. Асобна закраналася тэма прыцягнення на работу ў вобласці грамадзян з Узбекістана.

"Лінія фронту - на шчасце, мірнага - праходзіць цяпер праз Віцебскую вобласць. Бачыш, што і надвор'е такое, і іншае... І сам ты ў пекла гэта трапіў", - сказаў кіраўнік дзяржавы.

"Якая сітуацыя ў Віцебскай вобласці? Як разгортваюцца падзеі, якія праблемы там?" - абазначыў спектр ключавых пытанняў Аляксандр Лукашэнка.

Спытаў Прэзідэнт таксама пра грамадзян Узбекістана, якія прыбылі ў Беларусь для работы ў аграпрамысловым комплексе Віцебскай вобласці. "У тым ліку і па ўзбеках. Таму што да цябе яны перш за ўсё прыляцелі. Але памятай адно: малако і мяса - гэта перш за ўсё. Людзей не хапае - калі ласка. Іх зарплата - гэта трэцяе пытанне", - адзначыў кіраўнік дзяржавы.

Супрацоўніцтва паміж Беларуссю і Узбекістанам у гэтай сферы грунтуецца на ўзаемнай зацікаўленасці, падкрэсліў Аляксандр Лукашэнка. І аб гэтым ішла размова на нядаўніх перагаворах лідараў дзвюх краін. Беларусь як дзяржава з развітым АПК, вялікім аб'ёмам вытворчасці харчовай прадукцыі і дастатковымі плошчамі для вядзення сельскай гаспадаркі гатова супрацоўнічаць з Узбекістанам, каб садзейнічаць у насычэнні рынку гэтай краіны прадуктамі харчавання.

"Яны прасілі прадукцыю. Мы ў гэтым зацікаўлены. Яны гатовы інвесціраваць у сельскую гаспадарку. Таму што як без інвестыцый? Без малочнатаварных комплексаў і трактароў мяса і малака не атрымаеш. Мы гатовы вырабіць тут неабходнае. Не толькі ў Віцебскай вобласці. У нас жа ў Магілёўскай, Гомельскай і Гродзенскай абласцях людзі патрэбны. Але мэтанакіравана", - звярнуў увагу беларускі лідар.

БЕЛТА