У Белавежскай пушчы (Свіслацкі раён) напярэдадні каравай-фэсту "Бацькава булка" праходзіць пленэр, паведамілі карэспандэнту БЕЛТА ў Свіслацкім райвыканкаме.
Малады фестываль, які адбудзецца ў райцэнтры 17 жніўня, стаў ужо брэндавым на Гродзеншчыне. Яго ідэя нарадзілася пасля наведвання Прэзідэнтам мясцовай пякарні ў чэрвені 2021 года. Аляксандр Лукашэнка высока ацаніў смак свіслацкага хлеба, асабліва здобнай пляцёнкі, якая ў хуткім часе атрымала назву "Бацькава булка".
З кожным годам папулярнае свята пашыраецца і папаўняецца новымі цікавымі падзеямі. На гэты раз упершыню напярэдадні каравай-фэсту ў раёне праходзіць пленэр беларускіх мастакоў.
"На працягу бягучага тыдня дзесяць мастакоў з розных рэгіёнаў Беларусі будуць працаваць у Нацыянальным парку "Белавежская пушча" і ў іншых мясцінах нашага раёна, - расказаў намеснік старшыні Свіслацкага райвыканкама Юрый Кулікоў. - Пленэр праходзіць пад эгідай Беларускага саюза мастакоў. У ім прымае ўдзел і старшыня творчага саюза Глеб Отчык".
Кожны ўдзельнік пленэру на працягу тыдня створыць два творы. Пейзажы і нацюрморты будуць прадстаўлены на выставе ў час каравай-фэсту "Бацькава булка", а пасля яго завяршэння перададзены ў калекцыю раённага гісторыка-краязнаўчага музея.
Ужо рыхтуюцца вітрыны і пад брэндавыя экспанаты фестывалю - лепшыя хлебабулачныя і кандытарскія вырабы, якія сталі пераможцамі конкурсу, праведзенага напярэдадні ў Гродне. Свае работы прадставілі арганізацыі грамадскага харчавання, установы адукацыі, прадпрыемствы - вытворцы хлебабулачных і кандытарскіх вырабаў. Над стварэннем аднаго з караваяў працавала цэлая сямейная дынастыя. Пераможцаў вызначылі ў намінацыях "Сучасныя папулярныя віды хлеба", "Здаровае харчаванне", "Кандытарскія вырабы", "Хлеб у беларускіх традыцыях", "Нацыянальны хлеб".
"Некаторыя работы ствараліся па рэцэптах, што налічваюць не адно дзесяцігоддзе. Дзякуючы конкурсу ўсім прысутным удалося адчуць асаблівы смак беларускага хлеба, які ва ўсе часы сімвалізаваў дабрабыт, гасціннасць і дастатак. Лепшыя вырабы адправяцца ў Свіслач, дзе будуць прадстаўлены на цэнтральнай пляцоўцы каравай-фэсту "Бацькава булка", - адзначыла начальнік упраўлення гандлю і паслуг Гродзенскага аблвыканкама Вольга Карачун.
У раённым цэнтры тым часам ідзе актыўная падрыхтоўка да хлебнага свята. Як расказаў Юрый Кулікоў, ідзе мантаж сцэны, дзе разгорнуцца галоўныя падзеі фестывалю, устанаўліваюцца дэкарацыі.
У бягучым годзе свята будзе прысвечана 30-годдзю інстытута прэзідэнцтва ў Беларусі і 80-годдзю вызвалення краіны ад нямецка-фашысцкіх захопнікаў. Яго праграма як ніколі вялікая і разнастайная. Гасцей і ўдзельнікаў чакаюць прафесійныя конкурсы хлебапёкаў, спаборніцтвы майстроў-аматараў, дэгустацыя свежай выпечкі, зорныя канцэрты артыстаў беларускай і расійскай эстрады, спартыўныя спаборніцтвы, гульні і конкурсы.
Упершыню ў бягучым годзе на вуліцах горада пройдзе лёгкаатлетычная эстафета "Белавежскі забег", якая арганізуецца пад эгідай Беларускай федэрацыі лёгкай атлетыкі. У гарадскім парку пройдзе традыцыйны баскетбольны матч паміж камандамі Гродзенскага аблвыканкама і Свіслацкага райвыканкама.-0-