Марафон "Разам - за моцную і квітнеючую Беларусь!" сабраў 350 студэнтаў з Беларусі і Расіі. Аб гэтым карэспандэнту БЕЛТА паведамілі ў Гродзенскім дзяржаўным універсітэце імя Я.Купалы.
"Фінальныя мерапрыемствы грамадзянска-патрыятычнага марафону "Разам - за моцную і квітнеючую Беларусь!" праходзяць у Гродне. Удзел у марафоне прымаюць каля 350 прадстаўнікоў каманд 18 устаноў вышэйшай адукацыі і каледжаў Рэспублікі Беларусь і Расійскай Федэрацыі. Марафон стартаваў у 2015 годзе як універсітэцкі ў гонар 70-й гадавіны Перамогі ў Вялікай Айчыннай вайне, у 2018 годзе атрымаў статус рэспубліканскага і праводзіцца Купалаўскай ВНУ пры падтрымцы Міністэрства адукацыі Беларусі. А ў гэтым годзе ўпершыню набыў міжнародны маштаб", - расказалі ў ГрДУ імя Я.Купалы.
Удзел у фінальных мерапрыемствах марафону прымаюць універсітэты Гродна, Брэста, Віцебска, Мінска, Пскова, Тулы. А таксама навучэнцы каледжаў з Гомеля, Віцебска, Гродна, Мар'інай Горкі, Мінска, Магілёва, Пінска.
"Праграма фінальных мерапрыемстваў уключае ў сябе шырокае кола конкурсаў інтэлектуальнай, творчай і ваенна-спартыўнай накіраванасці, якія аб'яднаны ў чатыры намінацыі - "Моладзь. Ініцыятыва. Будучыня", "Знатакі роднай зямлі", "Разам - у абарону жыцця, маральнасці і сямейных каштоўнасцей" і "Да абароны Айчыны гатовы". Падвядзенне вынікаў марафону адбудзецца 5 мая. На гэты дзень запланаваны мітынг з ускладаннем кветак да помніка воінам - вызваліцелям Гродна і ўрачыстая цырымонія закрыцця на стадыёне Гродзенскага абласнога комплекснага цэнтра алімпійскага рэзерву", - адзначылі ў ВНУ.
Дарэчы, праект "Грамадзянска-патрыятычны марафон "Разам - за моцную і квітнеючую Беларусь!" удастоены гранта Прэзідэнта Рэспублікі Беларусь у сферы маладзёжнай палітыкі. Адпаведнае распараджэнне кіраўнік дзяржавы Аляксандр Лукашэнка падпісаў 30 снежня 2022 года. Мерапрыемствы марафону накіраваны на фарміраванне ў моладзі актыўнай грамадзянскай пазіцыі і патрыятызму, а таксама папулярызацыю сямейных каштоўнасцей і здаровага ладу жыцця.-0-