Амаль 200 удзельнікаў збярэ другі арт-праект "Духавы праспект" у Гродне

Другі арт-праект "Духавы праспект" адбудзецца ў Гродне. Аб гэтым карэспандэнту БЕЛТА расказала дырэктар Гродзенскага дзяржаўнага музычнага каледжа Ганна Сарасек. "Сёння Гродзенскі дзяржаўны музычны каледж стане цэнтрам прыцяжэння адораных, яркіх маладых вучняў і педагогаў духавога аддзялення з розных рэгіёнаў краіны, пляцоўкай для абмену вопытам і пошуку новых форм раскрыцця творчага патэнцыялу. На адной сцэне збяруцца тыя, хто піша гісторыю музычнай культуры сёння, і тыя, хто будзе вяршыць яе заўтра. А для аматараў духавой музыкі гэта будзе сапраўднае свята", - сказала Ганна Сарасек. Сваю творчасць публіцы падораць духавыя ансамблі Гродзенскага і Лідскага музычных каледжаў, Гродзенскага каледжа мастацтваў. Геаграфія ў гэтым годзе пашырылася - да яго далучыліся і вышэйшыя навучальныя ўстановы. "Упершыню на сцэне каледжа можна будзе пачуць ансамбль медных інструментаў Беларускага дзяржаўнага ўніверсітэта культуры і мастацтваў. І кожны выступіць не проста з музычным прывітаннем, але з цікавай і разнастайнай праграмай, пачынаючы ад квартэта саксафонаў, да самых рэдкіх ансамбляў", - адзначыла Ганна Сарасек. Паводле слоў кіраўніка ўстановы адукацыі, кульмінацыяй арт-праекта стане традыцыйнае сумеснае выступленне вучняў лепшых школ Гродзенскага метадычнага аб'яднання з духавым аркестрам Гродзенскага дзяржаўнага музычнага каледжа. У фінальным нумары на сцэне збяруцца каля 200 удзельнікаў праекта, узроставы дыяпазон якіх ад 6 да 70 гадоў, для сумеснага, яркага і феерычнага выканання вядомай кампазіцыі Генадзя Гладкова "Песенька зайца і ваўка на карнавале" з мультфільма "Ну, пачакай!" Арт-праект, аналагаў якому няма ў Беларусі, адбудзецца ў 16 гадзін у Гродзенскім дзяржаўным музычным каледжы.-0- БЕЛТА - Навiны Беларусi