Кераміка, ткацтва, музычныя інструменты. У Гродне адкрыецца выстава "Таленты Шчучынскай зямлі"

9 кастрычніка, Гродна /Кар. БЕЛТА/. Выстава "Таленты Шчучынскай зямлі" адкрыецца ў Гродне 10 кастрычніка. Аб гэтым карэспандэнту БЕЛТА паведаміла намеснік дырэктара Гродзенскага абласнога метадычнага цэнтра народнай творчасці Наталля Рамановіч. "У экспазіцыі будуць прадстаўлены такія напрамкі творчай дзейнасці, як ткацтва, кераміка, лозапляценне, выраб музычных інструментаў, вязанне кручком, вышыўка. Усе работы выкананы супрацоўнікамі аддзела рамеснай дзейнасці і народнага майстэрства Шчучынскага раённага цэнтра культуры і народнай творчасці, а таксама майстрамі раёна. На выставе таксама будуць прадстаўлены тэкстыльныя творы: дываны, ручнікі, паясы - багаты рэгіянальны матэрыял", - расказала Наталля Рамановіч. Паводле яе слоў, асаблівае месца ў экспазіцыі займае элемент нематэрыяльнай культурнай спадчыны "Беларускія мастацкія практыкі саломапляцення". У Шчучынскім раёне гэтым старажытным рамяством займаюцца чатыры майстры, у тым ліку народны майстар Беларусі Валянціна Краўчук. "У час урачыстага адкрыцця выставы носьбіты беларускай спадчыны майстры Вольга Роліч і Таццяна Лебедзевіч падзеляцца з усімі жадаючымі сакрэтамі саломапляцення і ткацтва паясоў на дошчачках, а Міхаіл Чарнадзедаў прадэманструе выраб драўляных музычных інструментаў", - дадала Наталля Рамановіч. Наведаць экспазіцыю "Таленты Шчучынскай зямлі" ўсе жадаючыя змогуць да 11 лістапада.-0- БЕЛТА - Навiны Беларусi