Вакцына "Спадарожнік Лайт" паступіла ў Беларусь

Вакцына "Спадарожнік Лайт" паступіла ў Беларусь, паведаміў журналістам міністр аховы здароўя Дзмітрый Піневіч, перадае карэспандэнт БЕЛТА. "Партыя паступіла ў аб'ёме 250 тыс. доз. Роўна столькі, колькі мы заказвалі. Я хацеў бы выказаць удзячнасць ураду Расійскай Федэрацыі, міністру аховы здароўя і кіраўніцтву РФПІ", - сказаў Дзмітрый Піневіч. Экспертны савет па імунізацыі (у складзе вядучыя спецыялісты ў галіне інфекцыйных хвароб як у дарослых, так і дзяцей, у галіне педыятрыі) рэкамендаваў прымяняць вакцыну ў выглядзе рэвакцынацыі, вакцынацыі пацыентаў пасля перанесенай каранавіруснай інфекцыі. Аднак у большай ступені яе будуць рэкамендаваць студэнцкай моладзі ад 18 да 23 гадоў. "Такі варыянт мы прапрацавалі. Лічым, што нашы студэнты вышэйшых навучальных устаноў, навучэнцы ССНУ, усе, хто пажадае, змогуць прышчапіцца гэтым відам вакцыны. Гэта аднаэтапная вакцынацыя з дасягненнем вельмі добрых паказчыкаў", - сказаў міністр. Ён дадаў, што студэнты і цяпер прышчэпліваюцца двухкампанентнымі вакцынамі, але цяпер выбар будзе яшчэ большы. Дзмітрый Піневіч заўважыў, што, паводле апошніх даных, вектарныя вакцыны маюць больш пралангаваны эфект. Таксама ён паведаміў, што па існуючай дамоўленасці з расійскімі стратэгічнымі партнёрамі ў хуткім часе пачнецца вытворчасць вакцыны "Спадарожнік Лайт" на магутнасцях "Белмедпрэпаратаў". Не выключана, што ў перспектыве вакцына будзе пастаўляцца на экспарт. "Мы сапраўды з нецярпеннем чакалі паступлення гэтай вакцыны, - сказаў міністр. - Мы ўваходзім у сезон павышанай эпідэмічнай захваральнасці. На савеце па імунізацыі мы правялі мазгавы штурм і абмеркавалі тактыку правядзення імунізацыі ў гэты асенні перыяд зыходзячы з таго, што прадаўжаецца вакцынацыя супраць каранавіруснай інфекцыі і паралельна пачнецца масавая вакцынацыя супраць грыпу". На падставе тых даных, якія ёсць у свеце, рэкамендацый СААЗ і іншых вядучых устаноў было прынята наступнае рашэнне. Тым людзям, якія плануюць вакцынавацца і супраць COVID-19, і супраць грыпу, рэкамендуецца першапачаткова закончыць вакцынацыю супраць каранавіруснай інфекцыі і не раней як праз 14 дзён пасля яе заканчэння вакцынавацца супраць грыпу. Пры жаданні вакцынавацца адначасова, гэта значыць у адзін дзень правесці вакцынацыю і супраць грыпу, і супраць COVID-19, гэта можна будзе зрабіць, калі ў пацыента няма проціпаказанняў да ўвядзення і той і другой вакцыны і пры падпісанні згоды на гэту працэдуру. Міністр таксама расказаў, што паміж прышчэпкай або раней перанесеным захворваннем і рэвакцынацыяй павінна прайсці прыкладна 6 месяцаў. Аднак у гэтым пытанні трэба падыходзіць індывідуальна. "Кожны пераносіць інфекцыю па-рознаму: нехта лёгка, нехта ў больш цяжкай форме. Таму рэкамендацыі заўсёды індывідуальныя. Лепш параіцца са сваім доктарам. Але ўніверсальная рэкамендацыя - шэсць месяцаў", - адзначыў Дзмітрый Піневіч. Міністр падкрэсліў, што ў Беларусі прытрымліваюцца добраахвотнасці пры вакцынацыі. "Але я ўвесь час апелюю да нашых даных і даных міжнародных мультыцэнтравых даследаваннях: шпіталізацыя вакцынаваных у 29 разоў меншая, чым непрышчэпленых. Таму мы ўсімі сіламі будзем рэкамендаваць вакцынавацца тым, хто гэтага яшчэ не зрабіў", - рэзюмаваў ён.-0-