Работа Островецкой районной библиотеки - одна из лучших на республиканском конкурсе

Відэа, падрыхтаванае Астравецкай раённай бібліятэкай, адзначана Дыпломам ІІ ступені на рэспубліканскім конкурсе творчых работ да Года народнага адзінства.

Конкурс аб’явіла Нацыянальная акадэмія навук Рэспублікі Беларусь, дзе, дарэчы, праходзіла і сама цырымонія ўзнагароджвання. Удзельнікі з розных рэгіёнаў краіны дасылалі творы разнастайных жанраў: вершы, прозу, фатаграфіі, відэа, песні і іншыя. Усяго было прадстаўлена больш за паўтары тысячы работ, сярод якіх журы вызначыла лепшыя ў сямі намінацыях. Відэа супрацоўнікаў Астравецкай раённай бібліятэкі атрымала высокую ацэнку ў намінацыі “Мова зямлі маёй”.

– Цырымонія ўзнагароджвання выклікала непаўторныя эмоцыі – гэта было ўрачыста і велічна, – падзялілася ўражаннем намеснік дырэктара бібліятэкі Наталля Ачарэтава. – Канешне, вельмі прыемна, што нашу работу палічылі адной з лепшых. І ў гэтым заслуга ўсіх, хто прыдачыніўся да яе стварэння, але ў першую чаргу – Галіны Францкевіч, якая прыдумала канцэпцыю.

– Калі нам прапанавалі паўдзельнічаць у конкурсе, адразу падумалася, што большасць удзельнікаў будуць дэманстраваць славутасці свайго краю – храмы і іншыя помнікі архітэктуры, – расказала Галіна Ігнатаўна. – Мне ж хацелася паказаць адметнасць радзімы з іншага боку, напрыклад, праз нашу сакавітую, унікальную і багатую дыялектамі мову і яе славутых носьбітаў – напрыклад, Казіміра Сваяка. Так з’явілася ідэя відэа “Мова зямлі жыве ў нашым краі”. Дзякуй усім калегам, якія падтрымалі задумку і дапамаглі ўвасобіць яе ў тое, што атрымалася. Было вельмі радасна, калі падчас уручэння дыплома хтосьці з членаў журы сказаў, што іх прыемна ўразіла наша работа. Словы навукоўцаў дарагога каштуюць, значыць, варта ганарыцца асаблівай астравецкай мовай.

Администрация сайта